Ermera, 03 de Agosto de 2026

Excia Prezidente Autoridade Munisipál Ermera Sr. José Martinho dos Santos Soares, halo abertura ba Avaliasaun Kondisaun Mínimu-AKM ba faze daruak hamutuk ho Ekipa avaliador husi Ministériu Administrasaun Estatal-MAE iha Salaun Autoridade Munisipál Ermera.

Excia Prezidente Autoridade Munisipál iha intervensaun hatete, Nu’udar Autoridade Munisipál Ermera, hau hato’o boas-vindas no agradese ba Senhor Diretór-Jerál, Koordenadór no membrus Ekipa III husi Ministériu Administrasaun Estatál-MAE, ne’ebé mai halo Avaliasaun faze daruak ba Dezempeñu, Estrutura no Kapasidade Institusionál Autoridade Munisipál Ermera iha tinan 2026, ba ami, avaliasaun ida-ne’e la’ós de’it atu determina pontuasaun.

Avaliasaun ida-ne’e nu’udar oportunidade atu tetu rezultadu ne’ebé ami konsege ona, identifika limitasaun no determina área sira ne’ebé presiza hadi’a diak liutan ba oin,Tanba ne’e, ami sei aprezenta resposta no meius verifikasaun ho abertura,responsabilidade no transparénsia.

Ami hein katak Ekipa avaliador husi MAE bele hare’e kondisaun real iha Ermera, inklui progresu, limitasaun no dezafiu sira ne’ebé ami enfrenta, Ami mos hein katak rezultadu no rekomendasaun husi avaliasaun ida-ne’e bele sai dalan ba solusaun konkreta, atu hadi’a administrasaun, planeamentu, rekursu umanu, jestaun,finanseira, koordenasaun institusionál no prestasaun servisu públiku, Ida-ne’e sei sai baze importante ba preparasaun Poder Lokál iha futuru. Ami prontu atu simu pergunta, observasaun no rekomendasaun konstrutiva husi Ekipa MAE, hodi kontinua hadi’a dezempeñu Autoridade Munisipál Ermera.

Mensajen Ermera; Autoridade Munisipál no povu Ermera tau fiar ba matenek, esperiénsia no dedikasaun husi Senhór Diretór-Jerál, Koordenadór no membrus Ekipa MAE-herói no heroína sira ne’ebé kontribui ba administrasaun públika no dezenvolvimentu nasaun.

Ita bele diferente iha hanoin no perspetiva, maibé ita nia hakarak no objetivu mak ida de’it: servisu hamutuk ba interese nasionál injerál, no espesifikamente ba dezenvolvimentu no moris-di’ak povu Ermera nian. Ho espírito unidade, responsabilidade no kooperasaun, mai ita transforma rezultadu Avaliasaun Faze daruak ida-ne’e sai dalan ba solusaun no esperansa foun ba povu Ermera.

Iha Avaliasaun ba faze daruak ne’e aprezentasaun hodi resposta ba kestionáriu husi PAM ho Estrutura AME, Diresaun Servisu Munisipais inklui Administrador Postu Administrativu 6, enkuantu Avaliasaun refere sei hala’o durante loron 2 hahu husi 03-04/08/2026.

Avaliasaun Faze Daruak MAE 2026.

Sulimutu, Ermera lao ba oin!

Sulimutu ba dezenvolvimentu!

Sulimutu ba moris-di’ak povu Ermera!

#AvaluasaunKondisaunMínimu_AKM

#Salaun_AutoridadeMunisipál_Gleno

#@Média AME/VIII/2026@#