Ermera, 03 Juñu 2026
Iha Segunda-Feira, loron 01 Juñu 2026, iha Salaun Igreja Parókia Nossa Senhora das Graças Gleno, Sua Excelénsia Prezidente Autoridade Munisipál Ermera, Sr. José Martinho dos Santos Soares, ne’ebé mós hala’o knaar nu’udar Prezidente Komisaun Organizadora, hamutuk ho ekipa komisaun, organiza no halibur Ermera oan hotu-hotu hodi partisipa iha Semináriu no Misa Reflesaun ho tema sentrál:
“ERMERA OAN IDA DE’IT, BA ERMERA IDA DI’AK LIU — DALAN BA PODÉR LOKÁL.”
Atividade ida-ne’e hetan partisipasaun husi Ermera oan ne’ebé servisu no kontribui iha área oioin, inklui Polísia Nasionál, Governu, lider partidu polítiku, lider universitáriu, akademia, Padre no Madre, veteranu/á, Administradór Postu, Xefe Suku, Xefe Aldeia, organizasaun feto, dirijenti asosiasaun agrikultura, eis deputadu/a, eis membru governu, diretór/a, NGO, eis administradór munisípiu, eis administradór postu, juventude, profesór/á, diretór/á kompañia, família defisiénsia, komunidade no konvidadu sira seluk.
Semináriu ne’e loke ofisialmente husi S.E. Prezidente Autoridade Munisipál Ermera, ne’ebé iha momentu hanesan mós asumi knaar nu’udar Prezidente Komisaun Organizadora. Depoizde abertura, S.E. Prezidente hato’o mós aprezentasaun temátiku nu’udar oradór dahuluk ho tópiku:
“Preparasaun Munisípiu Ermera ba Podér Lokál.” Liu husi aprezentasaun ida-ne’e, partisipante sira hatudu interese no preokupasaun boot kona-ba preparasaun Munisípiu Ermera ba etapa Podér Lokál. Iha sesaun diskusaun, partisipante balun hato’o pergunta, no barak mós hato’o sujestaun, hanoin no rekomendasaun konstrutivu, ho objetivu atu hametin preparasaun institusionál, administrativa, finanseiru no sosiál ba futuru Podér Lokál.
Husi diskusaun ne’e, sai rekomendasaun importante katak Autoridade Munisipál Ermera presiza kria ekipa taskforce ida ne’ebé forte, kompetente no sistemátika, hodi hala’o avaliasaun interna, identifika lakuna sira, prepara rekezitu sira ne’ebé Governu Sentrál presiza, no haforsa kapasidade instituisaun antes tama ba implementasaun Podér Lokál. Aleinde ne’e, partisipante sira mós rekomenda atu Munisípiu Ermera presiza identifika no dezenvolve fontes reseita lokál ne’ebé bele sustenta dezenvolvimentu, hadi’a prestasaun servisu públiku, no promove moris di’ak ba povu Ermera.
Iha parte espirituál, atividade kontinua ho Misa Reflesaun, ne’ebé prezide husi S.E. Reverendísimu Pe. Juvito Araújo do Rego, Episkopál ba Asuntu Pastorál no Reevanjelizasaun, hamutuk ho Pe. Recardino Castro, Vigáriu Foraneu Vigararia Ermera, no Nai Lulik sira ne’ebé mós marka prezensa. Liu husi misa reflesaun ida-ne’e, Amu Selebrante hato’o mensajen pastorál ne’ebé kle’an no importante ba Ermera oan hotu: tempu to’o ona atu tuur hamutuk, ko’alia ba malu, rona malu, halakon divizaun, hapara sobu malu, no hametin unidade ba futuru Ermera ida ne’ebé di’ak liu.
Semináriu no Misa Reflesaun ida-ne’e sai hanesan momentu importante atu halibur hanoin, hametin fraternidade, no harii kompromisu koletivu husi Ermera oan hotu-hotu, hodi prepara dalan ba Podér Lokál ho espíritu unidade, responsabilidade, transparénsia no servisu ba povu nia moris di’ak.
Ermera Oan Ida De’it, Ba Ermera Ida Di’ak Liu. Hamutuk Ita Prepara Ermera Ba Poder Lokál.
Ermera, 29 maio 2026
Sexta-Feira, 29/05/2026, Adjuntu Jerál Repúblika, Dr. Jacinto Babo Soares hamutuk ho Koordenadora Prokuradoria Repúblika Primeira Instánsia Dili-PRPID, Dra. Lidia Soares no Prokuradór Repúblika Delegasaun Munisípiu Ermera hala’o audéndia ho ExciaPrezidente Autoridade Munisipál, Sr. José Martinho dos Santos Soares iha Sala Audéndia PAM.
Objetivu husi sorumutuk ne’e atu hametin liu tan servisu hamutuk entre Ministériu Públiku ho Autoridade Munisipál Ermera oinsá atu tau atensaun ba Krime oi-oin ne’ebé akontese iha Munisípiu Ermera husi Postu Administrativu to’o ba Suku Sira. Ho okaziaun ne’e Ministériu Públiku hamutuk ho Autoridade Munisipál sei tun direta ba iha Postu Administrativu 6 iha tempu badak.
@#Média AME/V/2026@#
Ermera, 20 Maio 2026
Kuarta-Feira, 20/05/2026, Exelénsia Prezidente Autoridade Munisipál, Sr. José Martinho dos Santos Soares sai nu’udar Inspetúr ba Serimónia Isar Bandeira Nasionál iha Komemorasaun Loron Restaurasaun Independénsia ba dala ‘’XXIV’’ ho Tema ‘’Juntos Construiremos Uma Pátria Cada Vez Mais Justa, Inclusiva Resiliente’’ ne’ebé realiza iha kampu Demokrásia Gleno Munisípiu Ermera.
PAM iha entrevista hateten, depois de tinan 24 ita Restaura Independénsia iha mudansa lobuk ida iha aspetu oi-oin, hanesan S. E. Prezidente Repúblika Timor Leste, José Ramos Horta nia diskursu via online, nune’e mós Munisípiu Ermera iha mós mudansa ba dezenvolvimentu em jeral la’o ho diak hanesan aspetu ekonomia, sosial, Saúde no infraestrutura maibe presija mellora parte balun ne’ebé sei falta hodi atende nesesidade povu nian, maske konstrusaun estrada liga Gleno ba Letefoho sei sai hanesan obstakulu ida mai Munisípiu Ermera maibe ita iha esperansa katak Governu sei kompri nia promesa iha tinan ida ne’e.
Iha komemorasaun loron Restaurasaun Independénsia ba dala ‘’XXIV’’ 20 Maio 2026 ne’e ekipa Korpu Isar Bandeira Nasional maihusi ESTV Ernesto Fesnandes ‘’DUDU’’ no responsabeliza koru Isar Bandeira Nasional maihusi Eskola Sekundária Katólika Mater Misericordiae Lauala. Iha mós kompetisaun Kulinária husi suku 5 ne’ebé besik kapital Gleno, Puízia, dansa kultural no despostu komunitaria hanesan dada tali husi Komunidade, estudante, Universitariu, feto potensial Ermera, funsionariu, PNTL no F-FDTL hodi festeza loron importante ida ne’e.
Ermera, 18 Mei 2026
Ermera, 18 Maio 2026
Iha Vizita Traballu Ne’e, Exelénsia Prezidente Autoridade Munisipál, Sr. José Martinho dos Santos Soares hamutuk ho ekipa halo diálogu direta ho komunidade sira, hala’o mós vizita ba Postu Saude, Eskola, To’os Eskolar no tau ai-funan ba monumentu Herois da Patria iha suku Atara, Malabe, Tierlelo no Baboe Craic iha Postu Adminidtrativu Atsabe. Lansa mós Konstrusaun Refeitoriu ba Programa Merenda Eskolar iha suku Urahou, suku Fatubolo, Rehabilitasaun Estrada Rural iha suku Mau-ubo Postu Administrativu Hatolia B no tau mós fatuk dahuluk ba konstrusaun Kapela iha suku Parami Postu Administrativu Atsabe.
Postu Adminitrativu Atsabe kompostu husi suku 12 aldeia 59 no total populasaun 25,515 Habitantes, enkuantu Postu Administrativu Hatolia B kompostu husi suku 5 aldeia 26 no total populasaun 26,000 Habitantes.
Ermera, 23 Abril 2026
Estudante Estajiadu Nain 8 Husi Colegio Apostolo Paulo Lação Atsabe Munisipiu Ermera Remata Estudu Pratika iha Autoridade Munisipiu Ermera depois de Fulan 3
Ermera, 20 Abril 2026
MAE Liu husi Diresaun Nasional Formasaun no Kooperasaun – DNFK Servisu Hamutuk ho INAP no Diresaun Jeral Desentralizasaun no Governo Lokal fo Formasaun no Asistensia Tekniku ba Kargo Xefia inklui Administrador Posto Administrativo iha Munisípiu Ermera
Formasaun nee Abertura husi Exelénsia Presidente Autoridade Munisípiu Ermera, Sr. José Martinho dos Santos Soares Akompana husi representante Diretor Jeral Sr. Francisco Leto Cau hanesan mos Formador.
Formasaun nee hala’o durante loron lima (5), segunda-feira to sexta-feira.
Ermera, 26 Fevereiru 2026
VIZITA OFISIÁL PRIMEIRU MINISTRU KAY RALA XANANA GUSMÃO HO DELEGASAUN IHA MUNISÍPIU ERMERA
Kuarta-Feira, 25/02/2026, Prezidente Autoridade Munisipál Ermera, Sr. Jose Martinho dos Santos Soares simu Sua Exelénsia Primeiru Ministru Kay Rala Xanana Gusmão akompaña husi Ministru Administrasaun Estatal, Tomás do Rosário Cabral ho Delegasaun iha Salaun Parokiál Nossa Senhora da Graça Gleno Munisípiu Ermera, ‘’Hodi Hare Besik Servisu Munisipál husi Rezultadu Avaliasaun Kondisaun Mínima’’
S.E. Primeiru Ministru iha intervensaun hateten, hahu sente ona katak Munisípiu Ermera ne’e imi nian, tanba ne’e ejize imi atu deskobre hodi explora saida mak imi iha presija diskute hamutuk halo mós diálogu hahu husi suku mai to’o Munisípiu hodi hahu hari’i governu ida ne’ebé hakbesik a’an ba povu tanba simu ona responsabelidade hodi dezenvolve Munisípiu Ermera. Xefe Governu ne’e dezafia Prezidente Autoridade Munisipál hamutuk Ermera oan hotu relasiona ho desentralizasaun poder lokal ne’ebé sei hahu iha 2027 depende ba planu, ezekusaun no administrasaun ne’ebé iha. Husu mós kontribuisaun husi setór privadu no intelektuais Ermera nian tenke hanoin ona atu halo produsaun rasik tanba governu estabelese ona Banku Nasionál Dezenvolvimentu atu dezenvolve Mikro no Pequenas Emprezas.
Iha fatin hanesan Ministru Administrasaun Estatal, Sr. Tomás do Rosário Cabral hateten, Avaliasaun Kondisaun Mínima iha kestaun Administrasaun nomós kestaun balu rekomenda maihusi Câmara das Contas, tanba iha tinan kotuk avaliasaun ne’ebé Câmara das Contas haruka mai entre Munisípiu sira ida deit mak hetan notifikasaun dala rua, tanba Sistema ne’e integradu liga ho Governu Sentral no liga ba Munisípiu ida-idak bele asesu tanba ne’e iha Munisípiu Ermera kada suku Governu destaka ona Ofisiál Suku nain ha’at (4) presija fornese dadus liuhusi SIIGSA, Monografia no Demografia ho sistema dijitalizasaun ba iha Portal Munisipál, ezijensia ida husi Câmara das Contas mk Governu Lokal tenke hatama Planu Asaun Annual (PAA) no orsamentu tomak ba iha Portal Munisipál iha Munisípiu ida-idak.
Enkuantu Prezidente Autoridade Munisipál, Sr. José Martinho dos santos Soares halo aprezentasaun kona-ba Perfil Munisípiu no poténsia hotu ne’ebé Munisípiu Ermera iha nu’udar baze hodi responde ba kritériu sira mak hatu’ur iha Polítika Desentralizasaun Poder Lokál nian ne’ebé foka liu ba Dezenvolvimentu Ekonómiku, Sosiál, Infraestrutura no Institusional inklui Rekursu Umana, Rekursu naturais, Orsamentu no koordenasaun Munisipál nian. Alénde ne’e iha mós sesaun husu no hatan husi Autoridade lokal liu-liu populasaun Ermera agradese ba polítika desentralizasaun poder lokál nian no prontu simu poder lokál iha 2027.
Prezensa S.E. Primeiru Ministru iha Munisípiu Ermera hodi ‘’Hare besik servisu Munisipál nian, liu-liu rezultadu Avaliasaun Kondisaun Mínima ne’ebé mak hala’o husi Ministériu Administrasaun Estatal (MAE) hodi prepara Munisípiu hakat ba Eleisaun Kámara Munisipál iha 2027 mai’’. Hafoin S.E. Kay Rala Xanana Gusmão ho komitiva akompaña husi Prezidente Autoridade Munisipál vizita mós Maternidade Postu Saúde Railaco nu’udar Projetu PDIM iha 2022-2023, inklui uma rua (2) ne’ebé sei halo rehabilitasaun ba pessoál Saúde sira mak hakna’ar a’an iha Postu saúde refere.
Munisípiu Ermera kompostu husi Postu Administrativu ne’en (6) mak hanesan Atsabe, Letefoho, Ermera Villa, Hatolia A, Hatolia B no Railaco ho suku hamutuk limanulu resin ne’en (56). Partisipa iha diálogu aberta ne’e maihusi PAM ho estrutura, Xefe Gabinete PAM, Diretores Servisu Munisipais, Delegasaun Territorial, Prezidente CCI-TL, PNTL, F-FDTL, Sosiedade Sivil, Veteranus, Partidu Politikus, Eis Kargu Xefia, Administradores Postu Administrativu, Lideransa Komunitariu 56 inklui Pesoal Apoiu Suku, Funsionariu, ema ho defisiente no Komunidade.
@#Média AME/2026@#
Ermera, 25 Marsu 2026
Kuarta-Feira, 25/03/2026, Exelénsia Prezidente Autoridade Munisipál, Sr. José Martinho dos Santos Soares akompaña Sua Excia Ministru MAE, Sr. Tomás do Rosário Cabral iha ámbitu Serimónia Lansamentu Balkaun Úniku-BU Ermera ne’ebé realiza iha suku Talimoro, Gleno Munisípiu Ermera. Partisipa mós husi Sua Excia. Ministru Justisa no entidade relevantes sira.
Balkaun Úniku-BU nu’udar servisu tékniku ida hodi Desentraliza no Moderniza Servisu Públiku Sira iha Timor Leste ho Objetivu Prinsipál tolu (3) mak hanesan ‘’Hakbesik Prestasaun Servisu Públiku ba Sidadaun Sira, Moderniza no Simplika Servisu Atendimentu Públiku Lais no Fasil liu-liu Promove Transfarénsia no Boa Governasaun’’ atu nune’e Hakbesik no Halais Servisu Atendimentu Públikub a Sidadaun Sira.
Exelénsia PAM agradese ba S. E. Ministru Administrasaun ESTATAL, ho parte hotu ne’ebé esforsu hodi prepara fatin ne’ebé dignu liu husi Balkaun Úniku-BU, liu husi Balkaun Úniku sei fo atendementu BI, Sertidaun Rejistu Kriminal no Passaporte ba komunidade sira iha Munisipiu Ermera, tanba Munisípiu Ermera ho populasaun barak tebes númeru Segundo kompara ho Munisípiu seluk iha Timor-Leste. Liu husi Balkaun Úniku sei lori atendementu servisu públiku besik liu tan ba komunidade iha Munisipiu ida ne’e no sei fo atendimentu ba públiku iha tempu badak.
Balkaun Úniku-BU Ermera halo rehabalitasaun husi Kompañia HILOBADI UNIPESSOAL, LDA Apoiu Finanseiru husi UNDP.
@#Média AME/III/2026@#
© 2026 Administração Município de Ermera
