Ermera, 03 Juñu 2026

Iha Segunda-Feira, loron 01 Juñu 2026, iha Salaun Igreja Parókia Nossa Senhora das Graças Gleno, Sua Excelénsia Prezidente Autoridade Munisipál Ermera, Sr. José Martinho dos Santos Soares, ne’ebé mós hala’o knaar nu’udar Prezidente Komisaun Organizadora, hamutuk ho ekipa komisaun, organiza no halibur Ermera oan hotu-hotu hodi partisipa iha Semináriu no Misa Reflesaun ho tema sentrál:
“ERMERA OAN IDA DE’IT, BA ERMERA IDA DI’AK LIU — DALAN BA PODÉR LOKÁL.”

Atividade ida-ne’e hetan partisipasaun husi Ermera oan ne’ebé servisu no kontribui iha área oioin, inklui Polísia Nasionál, Governu, lider partidu polítiku, lider universitáriu, akademia, Padre no Madre, veteranu/á, Administradór Postu, Xefe Suku, Xefe Aldeia, organizasaun feto, dirijenti asosiasaun agrikultura, eis deputadu/a, eis membru governu, diretór/a, NGO, eis administradór munisípiu, eis administradór postu, juventude, profesór/á, diretór/á kompañia, família defisiénsia, komunidade no konvidadu sira seluk.

Semináriu ne’e loke ofisialmente husi S.E. Prezidente Autoridade Munisipál Ermera, ne’ebé iha momentu hanesan mós asumi knaar nu’udar Prezidente Komisaun Organizadora. Depoizde abertura, S.E. Prezidente hato’o mós aprezentasaun temátiku nu’udar oradór dahuluk ho tópiku:
“Preparasaun Munisípiu Ermera ba Podér Lokál.” Liu husi aprezentasaun ida-ne’e, partisipante sira hatudu interese no preokupasaun boot kona-ba preparasaun Munisípiu Ermera ba etapa Podér Lokál. Iha sesaun diskusaun, partisipante balun hato’o pergunta, no barak mós hato’o sujestaun, hanoin no rekomendasaun konstrutivu, ho objetivu atu hametin preparasaun institusionál, administrativa, finanseiru no sosiál ba futuru Podér Lokál.

Husi diskusaun ne’e, sai rekomendasaun importante katak Autoridade Munisipál Ermera presiza kria ekipa taskforce ida ne’ebé forte, kompetente no sistemátika, hodi hala’o avaliasaun interna, identifika lakuna sira, prepara rekezitu sira ne’ebé Governu Sentrál presiza, no haforsa kapasidade instituisaun antes tama ba implementasaun Podér Lokál. Aleinde ne’e, partisipante sira mós rekomenda atu Munisípiu Ermera presiza identifika no dezenvolve fontes reseita lokál ne’ebé bele sustenta dezenvolvimentu, hadi’a prestasaun servisu públiku, no promove moris di’ak ba povu Ermera.

Iha parte espirituál, atividade kontinua ho Misa Reflesaun, ne’ebé prezide husi S.E. Reverendísimu Pe. Juvito Araújo do Rego, Episkopál ba Asuntu Pastorál no Reevanjelizasaun, hamutuk ho Pe. Recardino Castro, Vigáriu Foraneu Vigararia Ermera, no Nai Lulik sira ne’ebé mós marka prezensa. Liu husi misa reflesaun ida-ne’e, Amu Selebrante hato’o mensajen pastorál ne’ebé kle’an no importante ba Ermera oan hotu: tempu to’o ona atu tuur hamutuk, ko’alia ba malu, rona malu, halakon divizaun, hapara sobu malu, no hametin unidade ba futuru Ermera ida ne’ebé di’ak liu.

Semináriu no Misa Reflesaun ida-ne’e sai hanesan momentu importante atu halibur hanoin, hametin fraternidade, no harii kompromisu koletivu husi Ermera oan hotu-hotu, hodi prepara dalan ba Podér Lokál ho espíritu unidade, responsabilidade, transparénsia no servisu ba povu nia moris di’ak.

Ermera Oan Ida De’it, Ba Ermera Ida Di’ak Liu. Hamutuk Ita Prepara Ermera Ba Poder Lokál.

@Média AME/VI/2026#@