José Martinho dos Santos Soares

1. Jeografia

Ermera mak munisípiu  ida husi Timor-Leste, ne’ebé lokaliza besik Díli, ho distância 62km. Munisípiu ida ne’e halo fronteira ho Munisípiu Aileu (este), Munisípiu Ainaro (sul), Munisípiu Bobonaro (oeste) no Munisípiu Liquiça (norte). Munisípiu referido iha postu administrativu 5 : Atsabe, Ermera, Hatolia, Letefoho no Railaco ne’ebé inklui 52 suku.
Demográfikamente, Ermera iha total de populasaun hamutuk 136,010 (tuir projesaun 2019) no densidade populasaun mak 176,44 ba área 770,83 km2. Grupu de populasaun ida ne’e, koalia lian : Tetun, Mambae no Kemak, populasaun sira mos halo negócio produtu lokal hanesan modo taha ho ai-fuan iha mercado lokal. Além de modo tahan no aifuan, Ermera conhecido ho produção café, ne’ebé mak halo mundo internacional conhece diak Timor-Leste liu husi exportação café. Ho produção café ne’ebé boot, café sai simbólo muncipio ida ne rasik.

2. Toponímia

Hanesan mós ho munisípiu seluk, Ermera mós iha signifikadu próprio ba naran munisípiu nian. Liafuan Ermera nian origem mai husi liafuan mambae, Er + mera. Tuir istória, iha tempu beiala sira haktuir katak, desde uluk gerasaun Ermera mai husi Foho 3 mak hanesan Kailitlau, Lalimlau no Hituria no naran Ermera mai husi Be’e matan ida iha foho tolu nian huun. Cor husi be’e matan referido ne’e mean hanesan ran.

3. Istória

Tuir istória, antes Portugues sira estabelese sira nian autoridade iha rai Ermera, iha ona autoridade tradisional ne’ebé ukun. Iha tinan 1698, Governo Portugues introdús sira nia autoridade, liu husi Governador António Coelho Guerreiro. Iha tinan ne, sira começa halo intervenção ba Autoridade tradisional sira iha Timor, unklui iha Ermera.  Iha loron 20 de Abril de 1859, liu husi Governador Afonso de Castro estabelese 11 Distritu, Ermera submete ba Distritu Atsabe ho nia sede iha Cailaco ne’ebé kompostu husi Reino Deribate, Laemean, Mahubo no Cailaco. Iha tinan 1908, Ermera sai hanesan commando militar ho sede iha Hatolia. Liu tiha Segunda Guerra Mundial, Governador Oscar Ruas muda komando militar ne’e transforma fali ba Circuscriação Civil ne’ebé kompostu husi postu administrativu civil Ermera Vila, Atsabe, Bazartete, Hatolia, Letefoho, Liquiçá. Iha tempu okupasaun indonésia, Ermera sai hanesan Distritu no ikus mai sai hanesan munisípiu.

4. Klima

Em termos de klima, jeralmente klima iha Munisipiu Ermera hanesan ho munisípiu seluk iha Timor-Leste.  Klima iha Ermera fahe ba epoka rua: epoka bai-loron, ne’ebé hahu husi fulan Julho too Setembro no epoka udan hahu husi Novembro to Junho. Rejistu udan hatudu katak, iha Outubro iha temperatura aas, 29c no iha Setembro iha temperatura ne’ebé ki’ik liu, 12c.

5. Pontu Interese

Pontu interese husi munisípiu Ermera inklui Kristu Liurai iha Letefoho no Mota Bandeira.