Ermera, 29 junho 2026
Segunda-Feira, 29 junho 2026, Autoridade Munisípiu Ermera realiza Misa Agradesimentu no Omenajen ba Saudozu Dr. Francisco Guterres “Lú-Olo”, iha Igreja Paroquiál Nossa Senhora das Graças, Gleno, Munisípiu Ermera.Misa ne’e prezide husi Amu Vigáriu Foráneu Ermera, Pe. Ricardino Mendonça Castro, ho partisipasaun husi Sua Excelência Prezidente Autoridade Munisipál Ermera, Sr. José Martinho dos Santos Soares, Sekretárius Autoridade Munisipál, Gabinete PAM, Assesór sira, Konsellu Parokial, Diretores Servisu Munisipais, Liña Ministeriais, Delegasaun Territorial, Veteranus, Sosiedade Sivíl, representante partidos políticos, PNTL, F-FDTL, funsionárius públiku, professores, estudantes, komunidade, no estrutura administrativa husi nível munisípiu, Postu Administrativu, suku no aldeia.Misa agradesimentu ne’e realiza nu’udar sinal tristeza kle’an, respeitu, omenajen no agradesimentu husi Autoridade Munisípiu Ermera ho povu Ermera tomak ba kontribuisaun boot Saudozu Dr. Francisco Guterres “Lú-Olo” iha luta libertasaun nasional, harii Estadu, hametin demokrasia, no fó inspirasaun ba gerasaun Timor-Leste sira atu kontinua hadomi rai, povu no nasaun. iha intervensaun, Sua Excelência PAM Ermera hato’o katak falesimentu Saudozu Dr. Francisco Guterres “Lú-Olo” mak lakon boot ida ba família enlutada, ba povu Timor-Leste, ba veteranus, ba komunidade rezisténsia, no liu-liu ba família faluk no oan-kiak sira ne’ebé sei nafatin lori iha fuan memoria kona-ba sagrifísiu no kontribuisaun lider nasional sira iha prosesu libertasaun pátria.Sua Excelência PAM mós subliña katak, embora Misa Agradesimentu realiza iha loron ohin iha Gleno, Autoridade Munisípiu Ermera antes ne’e vizita ona família enlutada iha rezidénsia Farol, Dili, iha Quinta-Feira, 25 Juni 2026, hodi hato’o diretamente kondolénsia, solidariedade no omenajen husi povu Ermera ba Saudozu Dr. Francisco Guterres “Lú-Olo”.Loron ohin sai loron importante no espesial ba Munisípiu Ermera, tanba povo Ermera hamutuk iha orasaun ida de’it hodi agradese ba moris, luta, lideransa no servisu nasional ne’ebé Saudozu Dr. Francisco Guterres “Lú-Olo” dedika ona ba Timor-Leste. Nia naran sei hela nafatin iha memoria nasional nu’udar gerileiru, lider istóriku, eis Prezidente Assembleia Konstituinte, eis Prezidente Parlamentu Nasional dahuluk, eis Prezidente Repúblika, no figura nasional ne’ebé fó kontribuisaun boot ba liberdade no dignidade povu Timor-Leste.Autoridade Munisípiu Ermera hato’o sentidu kondolénsia kle’an ba família enlutada, ba FRETILIN, ba veteranus sira, ba povu Timor-Leste tomak, no reza atu Maromak simu Saudozu Dr. Francisco Guterres “Lú-Olo” iha dame rohan-laek.Glória ba nia kontribuisaun, respeitu ba nia luta, no agradesimentu ba nia servisu ba Nasaun Timor-Leste.
