Ermera, 02 Jullu 2026
INTERVENSAUN SUA EXELÉNSIA PREZIDENTE AUTORIDADE MUNISÍPIU ERMERA HATETEN, Nu’udar Prezidente Autoridade Munisípiu Ermera hanesan uma-na’in iha loron importante ida-ne’e, ha’u hato’o boas-vindas ho respeitu boot ba Sua Excelência Presidente Parlamentu Nasionál, S.E. Prezidente Repúblika Demokrátika Timor Leste, S.E. Primeiru-Ministru, Excia Vise-Primeiru-Ministru, membru Governu, korpus diplomátiku, parseiru dezenvolvimentu no konvidadu onra sira hotu ne’ebé fó tempu atu marka prezensa iha Gleno, MunisÍpiu Ermera.
Ohin, Ermera sente onra boot tanba sai fatin ba lansamentu ofisiál Programa Pilotu Bolsa da MãebKondisionál ba Saúde Nutrisaun Inan no Oan – BdMK SANUTRIO. Programa ida-ne’e la’ós de’it programa sosiál; programa ida-ne’e mak investimentu nasional ba vida, saúde, nutrisaun no futuru oan Timor-Leste nian.
Iha naran povu Ermera, ha’u hato’o agradesimentu kle’an ba Sua Excelência Senhora Verónica das Dores, Ministra Solidariedade Sosiál no Inkluzaun, ba Ministériu Saúde, World Food Programme WFP, no ba ministériu, instituisaun no parseiru relevante sira hotu ne’ebé servisu hamutuk atu programa ida-ne’e bele to’o ba komunidade, liu-liu ba inan isin-rua, inan fó-susu, labarik ki’ik no família vulnerável sira.
“Sua Excelência sira, Ermera mak rai kafe, rai kultura, rai luta no rai unidade. Maibé iha tempu hanesan, ita mós,hatene katak ita nia komunidade sira seidauk livre husi dezafiu nutrisaun, saúde inan no oan, pobreza família vulnerável no asesu servisu báziku iha área rurál”.
Tuir dadus ne’ebé ita hetan, iha tinan 2020 taxa malnutrisaun kronika ka stunting iha, Ermera to’o besik 63,4%, no iha tinan 2025 tun ba 43%. Ida-ne’e hatudu progresu, maibé mós fó hanoin katak ita seidauk bele deskansa. Iha tempu hanesan, taxa malnutrisaun grave ba inan isin-rua no labarik tinan lima mai kraik ne’ebé antes besik 7%, ho esforsu Governu, parseiru Australia liu husi PHD, autoridade lokál no komunidade, konsege tun ba 3,6% iha tinan 2024-2025. Dadus hirak ne’e hatudu realidade rua: primeiru, problema seidauk hotu; segundu, bainhira Governu, parseiru, autoridade lokál no povu servisu hamutuk, mudansa pozitivu bele akontese.
“Tanba ne’e, BdMK-SANUTRIO iha Ermera tenke sai programa ida ne’ebé la’o ho koordenasaun di’ak, dadus klaru, transparénsia, monitorizasaun rigorozu no partisipasaun, komunidade. Ami iha Munisípiu Ermera kompromete atu apoia programa ida-ne’e ho seriedade, atu benefísiu bele to’o loos ba inan no oan sira ne’ebé presiza liu.”
Ami mós sei hametin koordenasaun ho postu administrativu, suku, aldeia, unidade saúde, escola, igreja, lideransa lokál, juventude no família sira, tanba nutrisaun di’ak la’ós responsabilidade ministériu ida de’it. Nutrisaun di’ak presiza família ne’ebé hatene, komunidade ne’ebé apoia, lideransa ne’ebé tau matan, no Estadu ne’ebé sempre besik povu.
“Sua Excelência sira, Lansamentu programa ida-ne’e iha Ermera fó mensajen klaru katak dezenvolvimentu nasional hahú husi família, husi inan, no husi labarik. Bainhira ita proteje inan, ita proteje nasaun. Bainhira ita haburas oan ho saúde no nutrisaun di’ak, ita harii fundamentu ba Timor-Leste ida-ne’ebé forte, produtivu no dignu iha futuru.”
Ikus liu, ha’u hato’o obrigadu barak ba lideransa nasional hotu ne’ebé fó konfiansa baMunisípiu Ermera, Obrigadu ba Sua Excelência Senhora Ministra Solidariedade Sosial no Inkluzaun ho ekipa tomak, ba Ministériu Saúde, WFP, ministériu relevante sira, parseiru dezenvolvimentu, autoridade lokál, igreja, veteranu, sosiedade sivil no komunidade Ermera tomak,Hamutuk ita bele halo BdMK-SANUTRIO sai susesu Hamutuk ita bele proteje inan, Hamutuk ita bele haburas oan.
Iha Serimónia Programa Lansamentu ofisiál Bolsa da Mãe ne’e mos hetan Partisipasaun maximu husi parte relevante sira hotu maka hanesan Sua Excelência Senhora Maria Fernanda Lay, Presidente Parlamentu Nasional da República Democrática de Timor-Leste;
Sua Excelência Senhor Dr. José Manuel Ramos-Horta, Prezidente da República Democrática de Timor-Leste; Sua Excelência Senhor Kay Rala Xanana Gusmão,Primeiru-Ministru da República Democrática de Timor-Leste no Chefe IX Governu Konstitusional, Sua Excelência Senhor Mariano Assanami Sabino Lopes, Vise-Primeiru-Ministru, Ministru Koordenadór ba Asuntu Sosiál no Ministru Dezenvolvimentu Rurál no Habitação Komunitária; Sua Excelência Senhor/a Embaixador/a no reprezentante diplomátiku sira ne’ebé marka prezensa; Sua Excelência Senhora Verónica das Dores, Ministra Solidariedade Sosiál no Inkluzaun; Suas Excelências Señoras Ministras, Senhores Ministros no Senhores Secretárius de Estado; Sua Excelências Senhores/as Presidentes Autoridade Munisipál sira,
Reprezentante World Food Programme-WFP, parseiru dezenvolvimentu no instituisaun Relevante sira, Senhores Diretores-Gerais, Diretores Nasionais, Autoridades Sivil no Militares, Sr. António Soares “Tata Mailau”, Prezidente CCLN Munisipiu Ermera, Reverendo Padre Recardino Mendonça Castro, Vigáriu Foráneu Ermera no Pároko Igreja ,Paróquia Nossa Senhora das Graças Gleno, Lideransa lokál, chefes suku, chefes aldeia, inan-aman, juventude, família ho difisiensia, sosiedade sivil, komunidade no povu Ermera tomak.
“Hamutuk ita bele harii Timor-Leste ida-ne’ebé saudável, forte, inkluzivu no la husik ema ida iha kotuk,Viva República Democrática de Timor-Leste! Viva Ermera, Viva saúde inan no oan”
#@MédiaAME/VII/2026@#
