ERMERA, 13 janeiru 2022 (TATOLI)–Ministériu Administrasaun Estatál (MAE) iha tinan 2021 prodús ona fixa família hamutuk 200.000 ba sidadaun iha territóriu tomak.

“Ha’u haruka imprime ona fixa família hamutuk 200.000 hodi haruka ba sede suku hotu, tanba ne’e husu autoridade lokál sira atu uza hodi atualiza fixa família sira tanba lista ne’ebé foin lalais hatama, uza ba subsídiu $200 no benefisiáriu ba Cesta Bázika ne’ebé ikus liu iha maiu 2020, katak tinan-rua ba kotuk,” Ministru Administrasaun Estatál, Miguel Pereira de Carvalho, informa iha diálogu komunitáriu, iha salaun Parokiál Gleno, Ermera, kinta ne’e.

Atualizasaun dadus hodi fó resposta ba programa seguransa alimentár ne’ebé sei implementa tinan ne’e ho alokasaun orsamentu millaun $80.

“Daudaun Ministériu Turizmu, Komérsiu no Indústria (MTKI) husu ona ba ha’u atu fó dadus ikus família no membru família iha suku idaidak,” nia akresenta.

Tanba ne’e, governante ne’e husu xefe suku atu atualiza fixa família ne’ebé atribui ona, nune’e bele fornese dadus ba administradór postu sira hodi submete ba Governu sentrál.

“Apelu ne’e la’ós de’it ba autoridade lokál munisípiu Ermera, maibé ba xefe suku hotu iha territóriu nasionál, hodi nune’e bele atualiza dadus molok implementa programa Governu ne’ebé aprova ona hosi Parlamentu Nasionál,” Ministru dehan.