Ermera, 21 de Julho de 2026
Tersa-Feira, 21/07/2026, Excia Prezidente Autoridade Munisipál Ermera, Sr. Jose Martinho dos Santos Soares partesipa iha Programa Diálogo da Paz ho Tema “CONSTRUÇÃO DA PAZ, CONSTRUÇÃO DO ESTADO, CONSTRUÇÃO DA NAÇÃO e CONSTRUÇÃO DO CARÁTER”, Programa ne’e realiza iha ESG Nino Konis Santana Gleno Munisípiu Ermera.
Iha PAM nia diskursu Hatete, ba dahuluk, ita agradese ba Nai Maromak tanba Nia grasa no bensaun, ne’ebé permite ita hotu halibur hamutuk iha serimónia importante ida-ne’e, nu’udar Autoridade Munisipál Ermera, Ha’u hato’o Boas-vindas no apresiasaun a’s ba Excelénsia Vise Primeiru Ministru, Sr. Mariano Assanami Sabino Lopes, Excelénsia Sekretáriu Estadu ESG-ESTV, Domingos Lopes Lemos, komisaun organizadora, professór, estudante, juventude no parte hotu ne’ebé promove diálogu ba dame liuhusi formasaun karákter.
“Dame la’ós de’it situasaun ne’ebé la iha konflitu, Dame signifika respeito malu, toleránsia, solidariedade, justisa, responsabilidade no kapasidade atu rezolve diferensa liuhusi diálogu, Tanba ne’e, formasaun karakter sai nu’udar baze importante ba hari’i sosiedade ida ne’ebé dame demokratiku, inkluzivu no respeita dignidade umana, Konstrusaun Estadu no nasaun la depende de’it ba infraestrutura ka instituisaun públika”Tenik PAM
Konstrusaun nasaun tenke hahú husi ema ida-idak nia karakter, atitude no responsabilidade, Sidadaun ne’ebé onestu, disiplinadu, tolerante no respeita lei sei fó kontribuisaun boot ba Estadu ida ne’ebé forte no justu.
“Ba estudante no foin-sa’e sira, imi mak jerasaun ne’ebé sei kontinua lori nasaun ida-ne’e ba oin, uza edukasaun hodi aumenta koñesimentu, uza diálogu hodi rezolve problema no uza imi nia kapasidade hodi serve komunidade no nasaun, labele permite violénsia, diskriminasaun, ódiu no divizaun estraga imi-nia futuru. Diferensa la’ós razaun atu fahe malu, maibé oportunidade atu aprende, respeita no hametin unidade.”PAM-Ermera.
Salienta
Ita hotu iha responsabilidade atu transforma família, eskola no komunidade sai fatin aprendizajen ba dame, Profesór sira forma koñesimentu no karakter; inan-aman sira fó ezemplu; lideransa sira promove justisa; no juventude sira tenke sai embaixadór dame iha komunidade.
Autoridade Munisipál Ermera kompromete atu kontinua apoia inisiativa sira ne’ebé promove edukasaun, formasaun karákter, diálogu, toleránsia, unidade no partisipasaun juventude iha prosesu dezenvolvimentu, ikus-liu ha’u konvida ita hotu atu hametin kompromisu: Hari’i dame hahú husi ita-nia a’an rasik, hametin unidade iha komunidade no servisu hamutuk ba konstrusaun Estadu no nasaun ida ne’ebé forte, justu no prósperu.
#@Média AME/VII/2026@#
